सरस्वती माध्यमिक विद्यालयको बारेमा

हाम्रो इतिहास र उत्पत्ति

प्रचलित किंवदन्ती अनुसार प्राचीन कालमा पूर्वेली भकियाहरुले उत्तरमा ओखलढुङ्गा, रामेछाप, दोलखादेखि धनुषा जिल्ला सम्म चिसापानीको यात्रा गर्ने क्रममा डोको बिसाएर आराम गर्ने यस ठाउँको नाम आदिवासी दनुवार जातिको भाषिक प्रचलन अनुसार "डोकाहा" राखिएको र उक्त शब्द अपभ्रंश हुँदै यस ठाउँको परिमार्जित नाम डकाहा भएको र डकाहा मै सञ्चालित भएको यस विद्यालयको नाम पनि धार्मिक संस्कृति अनुसार विध्याको अधिष्ठात्री देवी सरस्वतीकै नामबाट राख्ने तत्कालिन शिक्षाप्रेमी महानुभावहरुका निर्णयबाट विद्यालयको नाम "सरस्वती" राखिएको हो।

कमला नदीको उत्तर-दक्षिण किनारामा रहेको समथर भुभागको जंगल फँडानी गरी बसोबास योग्य जमिन निर्माण गरी आफ्नै जातिको बस्ती बसाउनको काम यस क्षेत्रका दनुवार जातिले नै गरेको भन्ने तथ्य यहाँ प्रचलित किंवदन्ती तथा अन्य विभिन्न आधार र प्रमाणबाट स्पष्ट हुन्छ। यहाँका गाउँ, टोल, बस्तीहरुको नामकरण समेत आदिवासी दनुवार जातिको भाषा र संस्कृति अनुसार गरिएकोबाट पनि दनुवार जातिले यस क्षेत्रका आदिवासी हुन् भनेर सकिन्छ। समयको परिवर्तन र विकासको लहरसँगै बसाइसराई गर्दै हाल यस क्षेत्रमा दनुवार जातिका अतिरिक्त ब्राम्हण, क्षेत्री, तामाङ, मगर, माझी, मुसहर, दमाई, कामी, सर्की, नेवार, सुनुवार, डुम लगायत अन्य जातिहरु समेतको बसोबास गणना योग्य छ।